Why is Oqaaserpassualeriffik necessary?

Ullut tamarluinnaasa oqaaserpassualerinermik suliat naammattoortarpavut atortarlutigillu, assersuutigalugu oqarasuaatini angallattakkani, internetimi, nutaarsiassani, ordbogini il.il., kisiannili tamakku tamarmik atorneqarsinnaapput kalaallisut oqaatsit atortinnagit.

Ukiut tamarluinnaasa oqaatsit 25-it missaanniittut toqusarput, maannamut nunarsuarmi oqaatsit 7000-it missaaniipput, naatsorsuutigineqarporlu ukioq 2100 tikitsinnagu oqaatsit 5400-t nungutaareersimassasut.

Taamaattumik nunarsuarmi oqaatsit imminnut unammilleqatigiipput, periarfissarsiullaqqinnerpaallu kisimik annassinnaallutik.

Oqaatsit inuummarissaatigisarpaat alliartuutigalugulu atorneqarnertik, taamaattumik atorneqanngikkunik sakkussanillu tuniorarneqanngikkunik nungutaassapput.

Kalaallisut oqaatsivut siunissaqartikkumallugit, aammalu oqaatsinik allanik unammillersinnaatinniarlugit suni tamani atortariaqarpavut aamma qarasaasiamik oqaasilerinerup silarsuaani, tassalu tammanna oqaaserpassualerinermik taasagarput.

Oqaaserpassualerineq imaannaanngitsuuvoq mersernartorsuaq, kisiannili ajornanngilaq. Alloriarnermi siulleq tassaassaaq sakkussanik tunngaviusunik pilersitsineq, kingornatigullu sakkussat tigussaasut, assersuutigalugit ordbogit il.il., aamma eletroniskiusumik atorneqarsinnaasut, assersuutigalugit nutserutit, sukkasuumik akikitsumillu pilersinneqarnissaat.

Oqaaserpassualerinermik ineriartortitsineq ingerlaarneruvoq sivisooq, ukiut siulliit arlallit inernernik takusaqarfiuneq ajortoq. Sulinerup taamaattup imarisarpaa kalaallisut oqaasilerinerup imaanik tamakkiisumik qarasaasiap paasisinnaasaanik malittarisassiorneq, maannamullu ukiut suliffiit tamakkersorfiusut arlallit atoreerpavut.

Oqaasilerinermik qarasaasiamut nuussinerup kingornatigut programit assigiinngitsut pilersinneqarput. Programit pineqartut qarasaasiamik oqaasilerinermi malittarisassianik passussisinnaassapput, naggataatigullu kalaallisut nagguiit uiguutit naanerillu assigiinngitsut qarasaasiamut immiunneqartussaallutik.

Programi pineqartoq eqqorluanngitsunik nutserisartumit, tassa Googlemit (kisitsisit atorlugit nassuiaasiornermik tunngaveqartoq) pitsaanerungaatsiassaaq malittarisassanik tunngaveqarami, pisinnaasaalu killeqanngingajalluinnarput.

Taamaattumik Oqaasileriffiup ataani Oqaaserpassualeriffimmi oqaasilerisutut ilungersorluta siunertaqarlutalu sulisimavugut maannamullu siuangaatsiareersimalluta. Toqqammavipput ima ninngutigilereersimavoq allaat anguniakkat takorlooruminaannerpaat, assersuutigalugit nutserutit aammalu kalaallisut e.learning, pilersinneqarsinnaaginnaratik ukiulli tallimat-qulit qaangiuppata pigineqalereersussaallutik.

Kalaallisut oqaatsit toqqammaviat ninngutsisarniarlugu, najugaqartunillu tamanit aammalu avataanit ilinniarneqarsinnaasunngortinniarlugu oqaaserpassualerinermi suliat ingerlapput, neriuutigaarpullu tamanit nittartagaq manna atorluarneqartarumaartoq.

Comments are closed.